Twiez

Die aanvanklike lied With Precious Stone Foundations was geïnspireer deur 'n gedeelte uit Openbaring 21. In die orkestrasie proses het die lied uitgebrei na 6 bewegings.  Die eerste beweging, Alfa Omega, is ook uit dieselfde gedeelte. Maar ter selfde tyd is die doel daarvan om die fokus te plaas op ons hemelse God, wat die begin en einde is van alles. Die tweede beweging gaan oor die wonder van die nuwe Jerusalem wat geskep word.  Die derde gedeelte kom uit Openbaring 4:8 en wil aansluit by die aanbidding van die Here voor Sy troon, waar hemelse wesens voortdurend Sy heiligheid verwoord. Die vierde beweging, Immanuel, gaan oor die betekenis van die woord en dit is dat God met ons is : Eers  Jesus Christus wat mens geword het en nou ook die Heilige Gees wat hier by ons is. Fish Eagles in The Air sluit aan daarby dat die Heilige Gees altyd by ons is.  Die roep van 'n visarend herinner my altyd aan die teenwoordigheid van God. Toe ek hierdie gedeelte geskryf het, was daar gereeld 'n paar visarende in die lug naby ons huis. Vandaar die titel. Terwyl ek dit geskryf het, was ek meer as gewoonlik bewus van ons hemelse Vader se liefde vir ons. Die afsluiting is weer Alfa Omega, God drie-enig wat die skepping omsluit.